La NGF grischuna privescha la scola populara grischuna da netto radund 30 milliuns francs. Bleras vischnancas grischunas èn memia pitschnas e finanzialmain memia deblas per far frunt al futur cun success.
Il pachet da taglia concludì il zercladur 2009 porta a las vischnancas grischunas in minus d’entradas da passa 40 milliuns francs. Era cun quest minus ston las vischnancas l’emprim vegnir a frida. Per la scola populara èn las consequenzas catastrofalas. Sch’il preventiv per la scola populara na tanscha betg pli, ston ins far concessiuns, la vischnanca vegn sfurzada da fusiunar. Qua tras van a perder x onns – ed era intginas annadas da noss uffants... Simplamain fusiunar las scolas na porta betg bler, perquai che mintga consorzi da scola è mo uschè debel da finanzas sco ses pli debel commember. Ultra da quai refusa la NGF grischuna era il sustegn finanzial per ils bus da scola.

Da princip na metta nagina vischnanca en dumonda la scola populara. Tuttina vegn la NGF ad avair consequenzas en quels secturs che segireschan ina buna qualitad da la scola populara, numnadamain en
• il sustegn d’uffants cun deblezzas d’emprender
• l’integraziun en la scola populara d’uffants cun difficultads, deblezzas d’emprender u cun in lev impediment (sche quella na succeda betg, pateschan tut ils uffants da la classa pertutgada)
• las cundiziuns da lavur per la magistraglia (grondezza da classa, infrastructura etc.)

Las uras da bloc, las structuras dal di, il plan d’instrucziun 21 ed autras refurmas da scola portan a la scola novs custs e novas incumbensas. Bleras vischnancas èn surdumandadas e da quai pateschan surtut ils uffants, ma era l’entir sistem da furmaziun e la finala era il chantun. In chantun intelligent na surlascha betg sia responsabladad per la scola populara a las vischnancas.