Servicenavigation
Hauptnavigation
Schnellzugriff
Inhalt
Pertge han ins insumma lantschà la NGF grischuna?
La gulivaziun da finanzas actuala è sa sviluppada en il decurs dal temp e dat mintgatant impuls negativs, per exempel cun impedir fusiuns da vischnancas per part raschunaivlas. Perquai accentueschan ils aderents dal project era adina puspè ch’i sa tractia surtut da midar las structuras communalas en il chantun Grischun. Quai po esser raschunaivel u betg, la via è en mintga cas fallada. I na po betg esser ch’ins adossescha incumbensas sensiblas sco la scola populara ed ils fatgs socials a las vischnancas e spera da las pudair sfurzar cun questa surpretensiun da sa fusiunar. I na dastga era betg esser che quai succeda a donn e cust da la populaziun; quels che ston numnadamain patir da questas mesiras èn surtut famiglias, uffants, persunas impedidas e persunas basegnusas. Sche la regenza vul midar las structuras da las vischnancas, duai ella esser sincera e metter en consultaziun ina lescha correspundenza.